मन बदरा

मानुखपन ले बदके दुनियाँ म,
मनखे के अउ नइय़े कहूं धरम ।
एक कटे दुजे जुरत रहय,
ये भारतवासी के नइये करम ।।

कतक कतक हम चोला बदलके,
ये मानुखतन हम पायेन ।
जाने कतक सांस जुटाके,
सुग्घर धरती म जनमे आयेन ।।

बीते समे तो कभू नी बहुरे,
दुनो हाथ लिखे हे अपनभाग ।
छइहां घाम हे अँग जिन्गी के,
मन बदरा के बदलन चाल ।।

बंधाय हाथ अब खोलव तो,
मिहनत के बजालव अब करताल ।
हिम्मत-सुम्मत के चुरो के चुरेना,
जुन्ना बिचार के फेंकव भ्रमजाल ।।